2. Surah Al-Baqarah, Kannada Translation

ಆ ಗ್ರಂಥ ¹. ಅದರಲ್ಲಿ ಸಂಶಯವೇ ಇಲ್ಲ. ಭಕ್ತರಿಗೆ ಪಥದರ್ಶಕ.

ಪರೋಕ್ಷದಲ್ಲಿ ¹ ನಂಬುವ, ನಮಾಝನ್ನು ನೆಲೆಗೊಳಿಸುವ ² ಮತ್ತು ಅವರಿಗೆ ನಾವು ³ ನೀಡಿದುದರಿಂದ ಖರ್ಚು ಮಾಡುವ (ಭಕ್ತರಿಗೆ).

ನಿಮಗೆ ಅವತೀರ್ಣಗೊಂಡದ್ದರಲ್ಲೂ ನಿಮಗಿಂತ ಮುಂಚೆ ಅವತೀರ್ಣಗೊಂಡದ್ದರಲ್ಲೂ ¹ ವಿಶ್ವಾಸವುಳ್ಳ ಭಕ್ತರವರು. ಪರಲೋಕದ ಕುರಿತು ಧೃಢ ವ್ರತರಾದವರು.

ಅಂಥವರು ತಮ್ಮ ಪ್ರಭುವಿನಿಂದ ಸತ್ಪಥದರ್ಶಿತರು. ಆ ಭಕ್ತರೇ ಜಯಶೀಲರು.

ನೀವು ಮುನ್ನೆಚ್ಚರಿಕೆ ಕೊಟ್ಟರೂ ಕೊಡದಿದ್ದರೂ ಸತ್ಯನಿಷೇಧಿಗಳಿಗೆ ಅದು ಸಮಾನ. ಅವರು ಖಂಡಿತ ವಿಶ್ವಾಸವಿಡಲಾರರು.

ಅವರ ಹೃದಯಗಳ ಮೇಲೆ ಮತ್ತು ಅವರ ಶ್ರವಣಗಳ ಮೇಲೆ ಅಲ್ಲಾಹನು ಮುದ್ರೆಯೊತ್ತಿರು ವನು¹. ಅವರ ಕಣ್ಣುಗಳ ಮೇಲೆ ಪೊರೆ ಬಾಧಿಸಿದೆ. ಅವರಿಗೆ ಘೋರ ಶಿಕ್ಷೆ ಕಾದಿದೆ.

‘ನಾವು ಅಲ್ಲಾಹ್ ಹಾಗೂ ಪಾರತ್ರಿಕ ದಿನವನ್ನು ನಂಬಿದ್ದೇವೆ’ ಎನ್ನುವ ಕೆಲವರಿದ್ದಾರೆ. ಅವರು ವಿಶ್ವಾಸಿಗಳಲ್ಲ ¹.

ಅವರು, ಅಲ್ಲಾಹು ಮತ್ತು ಸತ್ಯವಿಶ್ವಾಸಿಗಳನ್ನು ವಂಚಿಸುತ್ತಾರೆ. ಸತ್ಯದಲ್ಲಿ ತಮ್ಮ ಶರೀರಗಳನ್ನೇ ಹೊರತು ಅವರು ವಂಚಿಸುವುದಿಲ್ಲ. ಮತ್ತು ಅವರದನ್ನು ತಿಳಿಯುತ್ತಿಲ್ಲ.

ಅವರ ಹೃದಯಗಳಲ್ಲಿ ರೋಗವಿದೆ. ನಂತರ ಅಲ್ಲಾಹನು ಆ ರೋಗವನ್ನು ಉಲ್ಬಣಗೊಳಿಸಿದನು ¹. ಅವರು ಸುಳ್ಳು ಹೇಳುವವರಾಗಿದ್ದರಿಂದ ಅವರಿಗೆ ಯಾತನಾಮಯ ಶಿಕ್ಷೆ ಕಾದಿದೆ.

ಅವರಿಗೆ `ಭೂಮಿಯಲ್ಲಿ ನೀವು ಗೊಂದಲವೆಬ್ಬಿಸ ಬೇಡಿ’ ಎಂದು ಉಪದೇಶ ನೀಡಿದರೆ ಅವರು ‘ನಾವು ಸುಧಾರಕರು ಮಾತ್ರ, ಎನ್ನುತ್ತಾರೆ.

ತಿಳಿಯಿರಿ, ಅವರೇ ನಿಜದಲ್ಲಿ ಗೊಂದಲಕಾರರು. ಆದರೆ ಆ ಪ್ರಜ್ಞೆ ಅವರಿಗಿಲ್ಲ.

ಜನರು ಸತ್ಯವಿಶ್ವಾಸ ತಾಳಿದಂತೆ ನೀವೂ ಸತ್ಯ ವಿಶ್ವಾಸ ತಾಳಿರಿ’ ಎಂದು ಅವರಿಗೆ ಹೇಳಲಾದರೆ `ಮೂರ್ಖರು ನಂಬಿದಂತೆ ನಾವು ನಂಬಬೇಕೆ?’ ಎನ್ನುತ್ತಾರೆ. ತಿಳಿಯಿರಿ, ವಾಸ್ತವದಲ್ಲಿ ಅವರೇ ಮೂರ್ಖರು. ಆದರೆ ಅವರಿಗದು ಗೊತ್ತಿಲ್ಲ.

ವಿಶ್ವಾಸಿಗಳನ್ನು ಅವರು ಕಂಡರೆ, ‘ನಾವು ನಂಬಿದ್ದೇವೆ’ ಎನ್ನುತ್ತಾರೆ. ಅವರ ಪಿಶಾಚಿಗಳ ಬಳಿ ಪ್ರತ್ಯೇಕವಾಗಿರುವ ಸಂದರ್ಭದಲ್ಲಿ; ‘ನಾವು ನಿಮ್ಮ ಜೊತೆಯೇ ಇದ್ದೇವೆ, ಅವರನ್ನು ನಾವು ಕೇವಲ ಪರಿಹಾಸ ಮಾಡುತ್ತಿದ್ದೇವೆ.’ ಎನ್ನುತ್ತಾರೆ.

ನಿಜದಲ್ಲಿ ಅಲ್ಲಾಹನು ಅವರ ಪರಿಹಾಸ್ಯಕ್ಕೆ ಸಜೆ ನೀಡುವನು¹ . ತಮ್ಮ ದುರಾಚಾರದಲ್ಲಿ ಅಂಡಲೆಯುವಂತೆ ಅಲ್ಲಾಹನು ಅವರನ್ನು ಸಡಿಲು ಬಿಡುವನು.

ಅವರು ಸನ್ಮಾರ್ಗದ ಬದಲಿಗೆ ದುರ್ಮಾರ್ಗವನ್ನು ಖರೀದಿಸಿಕೊಂಡವರು. ಆದ್ದರಿಂದ ಅವರ ವ್ಯವಹಾರ ಲಾಭಕರವಾಗಿಲ್ಲ. ಅವರು ಸನ್ಮಾರ್ಗ ಪ್ರಾಪ್ತರೂ ಆಗಿಲ್ಲ.

ಅವರ ಉದಾಹರಣೆ ಕಿಚ್ಚು ಹಚ್ಚಿದವನ ಉದಾ ಹರಣೆಯಂತಿದೆ. ತನ್ನ ಸುತ್ತಮುತ್ತಲಿನ ಕಿಚ್ಚು ಬೆಳಗಿದಾಗ ಅಲ್ಲಾಹನು ಅವರ ಬೆಳಕನ್ನು ಕೊಂಡು ಹೋದನು. ಅವರು ದೃಷ್ಟಿ ಕಳಕೊಂಡು ಕಾರಿರುಳಲ್ಲಿ ದಾರಿ ಕಾಣದವರಂತೆ ಅವರನ್ನು ಬಿಟ್ಟುಬಿಟ್ಟನು ¹

ಕಿವುಡರು, ಮೂಗರು, ಕುರುಡರು ಅವರು. ಆದ್ದರಿಂದ ಅವರು ಮರಳಿ ಬರಲಾರರು.

ಅಥವಾ ಅವರ ಉಪಮೆ, ಆಕಾಶದಿಂದ ಸುರಿಯುವ ಜಡಿಮಳೆಯಂತಿದೆ. ಅದರಲ್ಲಿ ದಟ್ಟ ಕಾರಿರುಳು, ಗುಡುಗು ಮಿಂಚುಗಳೂ ಇವೆ. ಸಿಡಿಲೆರಗಿಸುವ ಮೃತ್ಯು ಭಯದಿಂದ ಅವರು ತಮ್ಮ ಕಿವಿಗಳಲ್ಲಿ ತಮ್ಮ ಬೆರಳುಗಳನ್ನು ತೂರಿಸಿಕೊಳ್ಳುತ್ತಾರೆ. ಅಲ್ಲಾಹನು ಸತ್ಯನಿಷೇಧಿಗಳನ್ನು (ಜ್ಞಾನ ಮತ್ತು ಸಾಮಥ್ರ್ಯಗಳಿಂದ) ಆವರಿಸಿಕೊಂಡಿರುತ್ತಾನೆ.

ಮಿಂಚು ಅವರ ಕಣ್ಣುಗಳನ್ನು ಕೋರೈಸುವಂತಿದೆ. ಮಿಂಚು ಪಳ್ಳನೆ ಬೆಳಗಿದಾಗ ಆ ಬೆಳಕಿನಲ್ಲಿ ಅವರು ನಡೆಯುತ್ತಾರೆ. ಮಿಂಚು ನಿಂತು ಇರುಳಾವರಿಸಿದಾಗ ನಿಂತು ಬಿಡುತ್ತಾರೆ. ಅಲ್ಲಾಹನು ಇಚ್ಛಿಸುತ್ತಿದ್ದರೆ ಅವರ ದೃಕ್‍ಶ್ರವಣಗಳನ್ನು ಹಿಂತೆಗೆದು ಕೊಳ್ಳುತ್ತಿದ್ದನು. ಖಂಡಿತಾ ಅವನು ಎಲ್ಲ ವಸ್ತುವಿನ ಮೇಲೆ ಸರ್ವ ಸಮರ್ಥನು¹.

ಮನುಷ್ಯರೇ, ನಿಮ್ಮನ್ನು ಹಾಗೂ ನಿಮ್ಮ ಪೂರ್ವಜರನ್ನು ಸೃಷ್ಟಿಸಿದ ನಿಮ್ಮ ಪ್ರಭುವಿಗೆ ಆರಾಧಿಸಿರಿ¹. ನೀವು ಜಾಗೃತಿಯುಳ್ಳವರಾಗುವಿರಿ.

ನಿಮಗೆ ಇಳೆಯನ್ನು ಹಾಸಿಗೆ ¹, ನಭವನ್ನು ಛಾವಣಿ ಮಾಡಿಕೊಟ್ಟವನು; ಅವನು ನಭದಿಂದ ಮಳೆಯನ್ನು ಇಳಿಸಿದನು. ಆ ಮೂಲಕ ನಿಮಗೆ ಉಪಭೋಗಕ್ಕೆ ಫಲಗಳನ್ನು ಹೊರಡಿಸಿದನು. ನೀವು ಇದೆಲ್ಲ ತಿಳಿದವರಾಗಿರುತ್ತ ಅವನಿಗೆ ಸಮಾನರನ್ನು ಕಲ್ಪಿಸದಿರಿ ².

ನಮ್ಮ ದಾಸನಿಗೆ ನಾವಿಳಿಸಿದ ಈ ಗ್ರಂಥದ ಬಗ್ಗೆ ನೀವು ಶಂಕಿತರಾಗಿದ್ದರೆ ¹, ತತ್ಸಮಾನ ಅಧ್ಯಾಯವೊಂದನ್ನು ರಚಿಸಿ ತನ್ನಿರಿ. ನೀವು ಸತ್ಯವಂತರಾಗಿದ್ದರೆ, ಅಲ್ಲಾಹನ ಹೊರತು ನಿಮ್ಮ ಸಾಕ್ಷಿದಾರರನ್ನೂ ನೆರವಿಗೆ ಕರೆದುಕೊಳ್ಳಿರಿ ².

ನೀವು ಅದನ್ನು ಮಾಡದಿದ್ದರೆ, ಖಂಡಿತ ನೀವು ಮಾಡಲಾರಿರಿ ¹. ಮನುಷ್ಯರನ್ನೂ ಕಲ್ಲುಗಳನ್ನೂ² ಇಂಧನವಾಗಿ ಉರಿಸಲ್ಪಡುವ ನರಕದ ಬಗ್ಗೆ ಜಾಗ್ರತೆಯಿರಲಿ! ಅದನ್ನು ನಿಷೇಧಿಗಳಿಗೆ ಕಾದಿರಿಸಲಾಗಿದೆ.

ಸತ್ಯವಿಶ್ವಾಸವಿರಿಸಿ, ಸತ್ಕರ್ಮ ಕೈಗೊಂಡವರಿಗೆ, ತಳಭಾಗದಲ್ಲಿ ನದಿಗಳು ಹರಿಯುತ್ತಿರುವ ಉದ್ಯಾನ ಗಳ ಸುವಾರ್ತೆಯನ್ನು ನೀಡಿರಿ. ಅವರಿಗಲ್ಲಿ ಆಹಾರವಾಗಿ ಹಣ್ಣುಗಳು ದೊರೆತಾಗ, ಈ ಮೊದಲು ಸಿಕ್ಕಿದ ಹಣ್ಣು ಇದೇ ತಾನೇ? ಎನ್ನುವರು¹. ಅವರಿಗೆ ಸಾದೃಶ್ಯವಾದ ಹಣ್ಣುಗಳನ್ನು ನೀಡಲಾ ಗುವುದು. ಅಲ್ಲಿ ಸಂಶುದ್ಧೆಯರಾದ ನಲ್ಲೆಯರೂ ಅವರಿಗಿರುವರು. ಅವರಲ್ಲಿ ನಿತ್ಯನಿವಾಸಿಗಳು.

ತೃಣ ಸೊಳ್ಳೆಯ ಯಾ ಅದಕ್ಕಿಂತ ಮೇಲಿನ ವಸ್ತುಗಳ ಉಪಮೆ ನೀಡಲು ಅಲ್ಲಾಹನಿಗೆ ಸಂಕೋಚವಿಲ್ಲ, ಅದು ಪ್ರಭುವಿನ ಕಡೆಯ ಸತ್ಯವೆಂಬುದನ್ನು ಸತ್ಯನಂಬಿಗರು ಬಲ್ಲರು. ಇಂತಹ ಉಪಮೆಗಳಿಂದ ಅಲ್ಲಾಹನ ಉದ್ದೇಶವಾದರೂ ಏನು ಎಂದು ನಿಷೇಧಿಗಳು ಕುಚೋದ್ಯ ಮಾಡುತ್ತಾರೆ ¹. ಇಂಥ ಉಪಮೆಗಳಿಂದ ಅಲ್ಲಾಹನು ಅನೇಕರಿಗೆ ಸತ್ಯದರ್ಶನವನ್ನು ಮಾಡುತ್ತಾನೆ. ಅನೇಕರಿಗೆ ಪಥ ವಿಮುಖತೆಯನ್ನು ಕೊಡುತ್ತಾನೆ. ಈ ಮೂಲಕ ಅಲ್ಲಾಹನು ಪಥಭ್ರಷ್ಟಗೊಳಿಸುವುದಿಲ್ಲ. ಅಧರ್ಮಿಗಳನ್ನು ಹೊರತು ².

ಆ ಅಧರ್ಮಿಗಳು ಯಾರೆಂದರೆ ಅಲ್ಲಾಹನ ಒಪ್ಪಂದವನ್ನು ದೃಢಪಡಿಸಿದ ಬಳಿಕ ಅದನ್ನು ¹ ಭಂಜಿಸುವ, ಅಲ್ಲಾಹನು ಬೆಸೆಯುವಂತೆ ಆಜ್ಞಾಪಿ ಸಿದ್ದನ್ನು ಬೇರ್ಪಡಿಸುವ ಹಾಗೂ ಭೂಮಿಯಲ್ಲಿ ಕ್ಷೋಭೆ ಹರಡುವವರು. ಅವರೇ ಹತಭಾಗ್ಯರು.

ಅಲ್ಲಾಹನನ್ನು ನೀವು ಹೇಗೆ ಧಿಕ್ಕರಿಸುತ್ತಿರುವಿರಿ? ನೀವು ನಿರ್ಜೀವಿಗಳಾಗಿದ್ದಿರಿ. ಆಮೇಲೆ ಅವನು ನಿಮ್ಮನ್ನು ಜೀವಂತಗೊಳಿಸಿದನು. ಮುಂದೆ ನಿಮ್ಮನ್ನು ಅವನು ಮೃತ್ಯುಗೊಳಿಸುವನು. ಮತ್ತೆ ನಿಮಗೆ ಜೀವಕೊಡುವನು. ನಂತರ ಆತನ ಕಡೆಗೇ ನಿಮ್ಮನ್ನು ಮರಳಿಸಲಾಗುತ್ತದೆ.

ಆತನು ಭೂಮಿಯಲ್ಲಿರುವುದನ್ನೆಲ್ಲ ನಿಮಗಾಗಿ ಸೃಷ್ಟಿಸಿದವನು ¹. ತದನಂತರ ಊಧ್ರ್ವಲೋಕಕ್ಕೆ ಚಿತ್ತವಿರಿಸಿ ಸಪ್ತಗಗನಗಳನ್ನಾಗಿ ಸರಿಪಡಿಸಿದನು. ಅವನು ಸರ್ವಜ್ಞನಾಗಿರುವನು.

ಪೃಥ್ವಿಯಲ್ಲಿ ನಾನು ಓರ್ವ ಪ್ರತಿನಿಧಿಯನ್ನು ನೇಮಿಸಲಿದ್ದೇನೆಂದು ನಿಮ್ಮ ಪ್ರಭು ಮಲಕ್ ಗಳೊಂದಿಗೆ ಹೇಳಿದಾಗ, ‘ಅಲ್ಲಿ ಪಿತೂರಿ, ರಕ್ತಪಾತ ನಡೆಸುವವರನ್ನು ನೇಮಿಸುವೆಯಾ? ನಿನಗೆ ಸ್ತುತಿ ಕೀರ್ತನೆ ಮಾಡಲು ಹಾಗೂ ನಿನ್ನ ಪರಿಶುದ್ಧತೆಯ ವಾಚನಕ್ಕೆ ನಾವಿದ್ದೇವಲ್ಲಾ?’ ಎಂದು ಮಲಕ್‍ಗಳು ಕೇಳಿದರು ¹. ಅದಕ್ಕೆ ಅಲ್ಲಾಹನು; “ನೀವರಿಯದ್ದನ್ನು ನಾನರಿಯುತ್ತಿದ್ದೇನೆ” ಎಂದು ಹೇಳಿದನು.

ಆದಮರಿಗೆ ಸರ್ವವಸ್ತುಗಳ ಹೆಸರುಗಳನ್ನು ಅಲ್ಲಾಹನು ಕಲಿಸಿದನು¹. ಅವೆಲ್ಲವನ್ನೂ ಮಲಕ್‍ಗಳೆದುರು ಪ್ರದರ್ಶಿಸುತ್ತಾ, ನಿಮ್ಮ ವಾದವು ದಿಟವಾಗಿದ್ದರೆ ಇವುಗಳ ಹೆಸರುಗಳನ್ನು ಹೇಳಿರಿ ಎಂದನು.

ಮಲಕ್‍ಗಳು ‘ನೀನು ಪರಮ ಪರಿಶುದ್ಧನು. ನೀನು ನಮಗೆ ಕಲಿಸಿಕೊಡದ ಜ್ಞಾನ ನಮಗಿಲ್ಲ, ಪರಮ ಜ್ಞಾನಿಯೂ ಪರಮತಂತ್ರಜ್ಞನೂ ನೀನೇ!’ ಎಂದರು

ಆಗ ಅಲ್ಲಾಹನು ಆದಮರನ್ನು ಕರೆದು, ‘ಇವುಗಳ ಹೆಸರುಗಳನ್ನು ಇವರಿಗೆ ಹೇಳಿಕೊಡು’ ಎಂದನು. ಆದಮರು ಅವುಗಳ ನಾಮಗಳನ್ನು ಅವರಿಗೆ ಹೇಳಿಕೊಟ್ಟರು. ಆಗ ಮಲಕ್‍ಗಳಲ್ಲಿ ಅಲ್ಲಾಹನೆಂದನು, ಭುವಿ - ನಭಗಳ ಸರ್ವ ರಹಸ್ಯ ಗಳನ್ನೂ , ನೀವು ಬಹಿರಂಗಗೊಳಿಸುವುದನ್ನೂ ಮರೆಮಾಚುತ್ತಿದ್ದುದನ್ನೂ¹ ಬಲ್ಲವನು ನಾನು ಎಂದು ನಿಮಗೆ ನಾನು ಹೇಳಿಲ್ಲವೇ?

ನಂತರ ‘ಆದಮರಿಗೆ ಪ್ರಣಾಮ ಸಲ್ಲಿಸಿರಿ’ ¹ ಎಂದು ನಾವು ಮಲಕ್‍ಗಳಿಗೆ ಆಜ್ಞಾಪಿಸಿದಾಗ, ಸರ್ವ ಮಲಕ್‍ಗಳೂ ಆದಮರಿಗೆ ಪ್ರಣಾಮ ಮಾಡಿದರು. ಇಬ್‍ಲೀಸನ ² ಹೊರತು. ಅವನು ನಿರಾಕರಿಸಿದನು. ಗರ್ವಿಷ್ಠನಾದನು. ಆತ ಸತ್ಯ ನಿಷೇಧಿಗಳ ಕೂಟದಲ್ಲಾಗಿದ್ದನು.

ಆ ಬಳಿಕ ನಾವು ಆದಮರೊಡನೆ, ಸ್ವರ್ಗದಲ್ಲಿ ಸಪತ್ನೀಕನಾಗಿ ನೆಲೆಸು. ನೀವಿಬ್ಬರೂ ಎಲ್ಲಿಂದಲೂ ಮನ ಬಂದಂತೆ ಭುಜಿಸಿರಿ, ಈ ಮರದ ಬಳಿ ಮಾತ್ರ ಸುಳಿಯದಿರಿ, ಅನ್ಯಥಾ ನೀವಿಬ್ಬರು ಅತಿಕ್ರಮಿಗಳ ಕೂಟಕ್ಕೆ ಸೇರುವಿರಿ¹. ಎಂದೆವು.

ಆದರೆ ಸೈತಾನನು ಅವರನ್ನು ಅದರಿಂದ ತಪ್ಪಿಸಿದನು. ಅವರಿಬ್ಬರೂ ಅನುಭವಿಸುತ್ತಿದ್ದ ಸುಖ ಸ್ಥಿತಿಯಿಂದ ಇಬ್ಬರನ್ನೂ ಹೊರಹಾಕಿಸಿದನು, ಆಗ, ‘ಇಳಿದು ಹೋಗಿರಿ, ನೀವಿನ್ನು ಪರಸ್ಪರ ವೈರಿಗಳು. ಭೂಮಿಯಲ್ಲಿ ಒಂದು ನಿರ್ಧಿಷ್ಠಾವಧಿ ವಾಸ್ತವ್ಯ ಮತ್ತು ಜೀವನಾನುಕೂಲ ನಿಮಗಿರುವುದು’ ಎಂದು ನಾವು ಆಜ್ಞಾಪಿಸಿದೆವು.

ತರುವಾಯ ಆದಮರು ತನ್ನ ಪ್ರಭುವಿನಿಂದ ಕೆಲವು ವಚನಗಳನ್ನು ಗ್ರಹಿಸಿಕೊಂಡರು¹. ಆಗ ಪ್ರಭು ಅವರಿಗೆ ಮನ್ನಿಸಿದನು. ಅವನು ದಯಾನಿಧಿಯೂ ಕ್ಷಮಾಶೀಲನೂ ಆಗಿರುತ್ತಾನೆ.

ನಾವು ಹೇಳಿದೆವು; ನೀವೆಲ್ಲರೂ ಇಲ್ಲಿಂದ ಇಳಿದು ಹೋಗಿರಿ. ನನ್ನ ಕಡೆಯಿಂದ ಮಾರ್ಗದರ್ಶನವು ನಿಮಗೆ ಬಂದರೆ, ಯಾರು ನನ್ನ ಮಾರ್ಗ ದರ್ಶನವನ್ನು ಅನುಸರಿ ಸುತ್ತಾರೆ, ಅವರಿಗೆ ಯಾವುದೇ ಭಯ, ವ್ಯಸನಗಳಿಲ್ಲ.

ಸತ್ಯವನ್ನು ಧಿಕ್ಕರಿಸಿ ನಮ್ಮ ಕುರುಹುಗಳನ್ನು ಹುಸಿಗೊಳಿಸಿದವರು ನರಕದವರಾಗುವರು. ಅವರದರಲ್ಲಿ ನಿತ್ಯ ನಿವಾಸಿಗಳು.