45. سورہ الجاثية

اِس کتاب کا نزول اللہ کی طرف سے ہے جو زبردست اور حکیم ہے۔¹

حقیقت یہ ہے کہ آسمانوں اور زمین میں بے شمار نشانیاں ہیں  ایمان لانے والوں کے لیے۔¹

اور تمہاری اپنی پیدائش میں، اور اُن حیوانات میں جن کو اللہ (زمین میں)پھیلا رہا ہے، بڑی نشانیاں ہیں اُن لوگوں کے لیے جو یقین لانے والے ہیں۔¹

اور شب و روز کے فرق و اختلاف میں ، ¹ اور اُس رزق میں² جسے اللہ آسمان سے نازل فرماتا ہے پھر اس کے ذریعہ سے مُردہ زمین کو جِلا اُٹھاتا ہے،³ اور ہواوٴں کی گردش میں ⁴ بہت نشانیاں ہیں اُن لوگوں کے لیے جو عقل سے کام لیتے ہیں

یہ اللہ کی نشانیاں ہیں جنہیں ہم تمہارے سامنے ٹھیک ٹھیک بیان کر رہے ہیں۔ اب آخر اللہ اور اس کی آیات کے بعد اور کون سی بات ہے جس پر یہ لوگ ایمان لائیں گے۔¹

تباہی ہے ہر اُس جھوٹے بد اعمال شخص کے لیے

جس کے سامنے اللہ کی آیات پڑھی جاتی ہیں ، اور وہ اُن کو سُنتا ہے، پھر پُورے اِستکبار کے ساتھ اپنے کُفر پر اِس طرح اَڑا رہتا ہے کہ گویا اُس نے  اُن کو سُنا ہی نہیں۔¹ ایسے شخص کو دردناک عذاب کا مُژدہ سُنا دو

ہماری آیات میں سے کوئی بات جب اس کے علم میں آتی ہے تو وہ اُن کا مذاق بنا لیتا ہے۔¹ ایسے سب لوگوں کے لیے ذلّت کا عذاب ہے

اُن کے آگے جہنّم ہے۔¹ جو کچھ بھی انہوں نے دنیا میں کمایا ہے اس میں سے کوئی چیز اُن کے کسی کام نہ آئے گی، نہ اُن کے وہ سرپرست ہی اُن کے لیے کچھ کر سکیں گے جنہیں اللہ کو چھوڑ کر انہوں نے اپنا ولی بنا رکھا ہے۔² اُن کے لیے بڑا عذاب ہے