50. Surah Qaf, Swahili Translation

Bali wanastaajabu kwamba amewafikia mwonyaji kutoka miongoni mwao, na wakasema makafiri: Hili ni jambo la ajabu! ¹

Ati tukifa na tukawa udongo? Kurejea huko kuko mbali! ¹

Hakika Sisi tunajua kiasi cha kila kinacho punguzwa na ardhi kutokana nao. Na kwetu kipo Kitabu kinacho hifadhi yote. ¹

Lakini waliikanusha Haki ilipo wajia; kwa hivyo wamo katika mambo ya mkorogo. ¹

Je! Hawaangalii mbingu zilizo juu yao! Vipi tulivyo zijenga, na tukazipamba. Wala hazina nyufa. ¹

Na ardhi tumeitandaza na tukaiwekea milima, na tukaiotesha mimea mizuri ya kila namna. ¹

Yawe haya ni kifumbua macho na ukumbusho kwa kila mja mwenye kuelekea. ¹

Na tumeteremsha kutoka mbinguni maji yaliyo barikiwa, na kwa hayo tukaotesha mabustani na nafaka za kuvunwa. ¹

Na mitende mirefu yenye makole yaliyo zaa kwa wingi, ¹

Ili iwe ni riziki kwa waja wangu. Na tukaifufua kwa maji nchi iliyo kuwa imekufa. Kama hivyo ndivyo utakavyo kuwa ufufuaji. ¹

Kabla yao walikadhibisha kaumu ya Nuhu na wakaazi wa Rassi na Thamudi. ¹

Na A'di na Firauni na kaumu ya Lut'i. ¹

Na wakaazi wa Machakani, na watu wa Tubbaa'. Wote hao waliwakanusha Mitume, kwa hivyo onyo likathibitika juu yao. ¹

Kwani tulichoka kwa kuumba mara ya kwanza. Bali wao wamo katika shaka tu juu ya umbo jipya. ¹

Na hakika tumemuumba mtu, nasi tunayajua yanayo mpitikia katika nafsi yake. Na Sisi tuko karibu naye kuliko mshipa wa shingoni mwake. ¹

Wanapo pokea wapokeaji wawili, wanao kaa kuliani na kushotoni. ¹

Hatamki neno ila karibu yake yupo mwangalizi tayari. ¹

Na uchungu wa kutoka roho utamjia kwa haki. Hayo ndiyo uliyo kuwa ukiyakimbia. ¹

Na litapulizwa baragumu. Hiyo ndiyo Siku ya Miadi. ¹

Na kila nafsi itakuja na pamoja nayo mchungaji na shahidi. ¹

(Aambiwe): Kwa hakika ulikuwa umeghafilika na haya; basi leo tumekuondolea pazia lako, na kwa hivyo kuona kwako leo ni kukali. ¹

Na mwenzake atasema: Huyu niliye naye mimi kesha tayarishwa. ¹

Mtupeni katika Jahannamu kila kafiri mwenye inda, ¹

Akatazaye kheri, arukaye mipaka, mwenye kutia shaka, ¹

Aliye weka mungu mwengine pamoja na Mwenyezi Mungu. Basi mtupeni katika adhabu kali. ¹

Mwenzake aseme: Ee Mola wetu Mlezi! Sikumpoteza mimi, bali yeye mwenyewe alikuwa katika upotovu wa mbali. ¹

(Mwenyezi Mungu) aseme: Msigombane mbele yangu. Nilikuleteeni mbele onyo langu. ¹

Mbele yangu haibadilishwi kauli, wala Mimi siwadhulumu waja wangu. ¹

Siku tutapo iambia Jahannamu: Je! Umejaa? Nayo itasema: Je! Kuna ziada? ¹

Na Pepo italetwa karibu kwa ajili ya wachamngu, haitakuwa mbali. ¹

Haya ndiyo mnayo ahidiwa kwa kila mwenye kurejea kwa Mwenyezi Mungu na akajilinda. ¹

Mwenye kumwogopa Mwingi wa Rehema hali kuwa hamwoni, na akaja kwa moyo ulio elekea ¹

(Ataambiwa) ingieni kwa salama. Hiyo ndiyo siku ya daima dawamu. ¹

Humo watapata wakitakacho, na kwetu yako ya ziada. ¹

Na kaumu ngapi tuliziangamiza kabla yao walio kuwa na nguvu zaidi kuliko hawa! Nao walitanga tanga katika nchi nyingi. Je! Walipata pa kukimbilia? ¹

Hakika katika hayo upo ukumbusho kwa mwenye moyo au akatega sikio naye yupo anashuhudia. ¹

Na bila ya shaka Sisi tumeziumba mbingu na ardhi na vilio baina yao mnamo siku sita; na wala hayakutugusa machofu. ¹

Basi vumilia kwa hayo wasemayo, na mtakase kwa kumsifu Mola wako Mlezi kabla ya kuchomoza jua na kabla ya kuchwa. ¹

Na katika usiku pia mtakase, na baada ya kusujudu. ¹

Na sikiliza siku atapo nadi mwenye kunadi kutoka pahala karibu. ¹

Siku watakapo sikia ukelele wa haki. Hiyo ndiyo siku ya kufufuka. ¹

Hakika Sisi tunahuisha na tunafisha, na kwetu Sisi ndio marejeo. ¹

Siku itapo wapasukia ardhi mbio mbio! Mkusanyo huo kwetu ni mwepesi. ¹

Sisi tunajua kabisa wayasemayo. Wala wewe si mwenye kuwatawalia kwa ujabari. Basi mkumbushe kwa Qur'ani anaye liogopa onyo. ¹