40. سورہ غافر

وہ بڑے بننے والے جواب دیں گے”ہم سب یہاں ایک حال میں ہیں، اور اللہ بندوں کے درمیان فیصلہ کر چکا ہے۔“ ¹

پھر یہ دوزخ میں پڑے ہوئے لوگ جہنم کے اہل کاروں سے کہیں گے "اپنے رب سے دعا کرو کہ ہمارے عذاب میں بس ایک دن کی تخفیف کر دے"

وہ پوچھیں گے”کیا تمہارے پاس تمہارے رسُول بیّنات لے کر نہیں آتے رہے تھے؟“وہ کہیں گے”ہاں۔“ جہنّم کے اہل کار بولیں گے”پھر تو تم ہی دُعا کرو ، اور کافروں کی دُعا اکارت ہی جانے والی ہے۔“ ¹

یقین جانوکہ ہم اپنے رسولوں اور ایمان لانے والوں کی مدد اِس دُنیا کی زندگی میں بھی لازماً کرتے ہیں،¹ اور اُس روز بھی کریں گے جب گواہ کھڑے ہوں گے،²

جب ظالموں کو ان کی معذرت کچھ بھی فائدہ نہ دے گی اور اُن پر لعنت پڑے گی اور بد ترین ٹھکانا اُن کے حصے میں آئے گا

آخر دیکھ لو کہ موسیٰؑ کی ہم نے رہنمائی کی ¹اور بنی اسرائیل کو اس کتاب کا وارث بنا دیا

جو عقل و دانش رکھنے والوں کے لیے ہدایت و نصیحت تھی۔¹

پس اے نبیؐ ، صبر کرو،¹ اللہ وعدہ بر حق ہے² ، اپنے قصُور کی معافی چاہو،³ اور صبح و شام اپنے ربّ کی حمد کے ساتھ اس کی تسبیح کرتے رہو۔⁴

حقیقت یہ ہے کہ جو لوگ کسی سَنَد و حجّت کے بغیر جو اُن کے پاس آئی ہو، اللہ کی آیات میں جھگڑے کر رہے ہیں اُن کے دلوں میں کِبر بھرا ہوا ہے¹، مگر وہ اُس بڑائی کو پہنچنے  والے نہیں ہیں جس کا وہ گھمنڈ رکھتے ہیں۔² بس اللہ کی پناہ مانگ لو،³ وہ سب کچھ دیکھتا اور سُنتا ہے