41. سورہ فصلت

کہتے ہیں”جس چیز کی طرف تُو ہمیں بُلا رہا ہے اس کے لیے ہمارے دلوں پر غلاف چڑھے ہوئے ہیں، ¹ ہمارے کان بہرے ہوگئے ہیں، اور ہمارے اور تیرے درمیان ایک حجاب حائل ہو گیا ہے۔ ² تُو اپنا کام کر ، ہم اپنا کام کیے جائیں گے۔“ ³

اے نبی ؐ، اِن سے کہو، میں تو ایک بشر ہوں تم جیسا۔ ¹ مجھے وحی کے ذریعہ سے بتایا جاتا ہے کہ تمہارا خدا تو بس ایک ہی خدا ہے ² ، لہٰذا تم سیدھے اُسی کا رُخ اختیار کرو ³ اور اس سے معافی چاہو۔ ⁴ تباہی ہے اُن مشرکوں کے لیے

جو زکوٰة نہیں دیتے ¹ اور آخرت کے منکر ہیں

رہے وہ لوگ جنہوں نے مان لیا اور نیک اعمال کیے،  اُن کے لیے یقیناً ایسا اجر ہے جس کا سلسلہ ٹوٹنے والا نہیں ہے۔ ¹

اے نبیؐ! اِن سے کہو، کیا تم اُس خدا سے کفر کرتے ہو اور دوسروں کو اُس کا ہمسر ٹھیراتے ہو جس نے زمین کو دو دنوں میں بنا دیا؟ وہی تو سارے جہان والوں کا رب ہے

اُس نے (زمین کو وجود میں لانے کے بعد)اوپر سے اس پر پہاڑ جمادیے اور اس میں برکتیں رکھ  دیں ¹ اور اس کے اندر سب مانگنے والوں کے لیے ہر ایک کی طلب و حاجت کے مطابق ٹھیک اندازے سے خوراک کا سامان مہیّا کر دیا۔ ² یہ سب کام چار دن میں ہو گئے۔ ³

پھر وہ آسمان کی طرف متوجہ ہوا جو اُس وقت دھواں تھا۔ ¹ اُس نے آسمان اور زمین سے کہا”وجود میں آجاوٴ، خواہ تم چاہو یا نہ چاہو۔“ دونوں نے کہا”ہم آگئے فرمانبرداروں کی طرح۔“ ²

تب اُس نے دو دن کے اندر  سات آسمان بنا دیے، اور ہر آسمان میں اُس کا قانون وحی کردیا۔ اور آسمانِ دنیا کو ہم نے چراغوں سے آراستہ کیا اور اسے خوب محفوظ کر دیا۔ ¹  یہ سب کچھ ایک زبردست علیم ہستی کا منصُوبہ ہے

اب اگر یہ لوگ منہ موڑتے ہیں ¹ تو اِن سے کہہ دو کہ میں تم کو اُسی طرح کے ایک اچانک ٹوٹ پڑنے والے عذاب سے ڈراتا ہوں جیسا عاد اور ثمود پر نازل ہوا تھا