23. سورہ المؤمنون

کوئی قوم نہ اپنے وقت سے پہلے ختم ہوئی اور نہ اس کے بعد ٹھیر سکی

پھر ہم نے پے درپے رسُول بھیجے۔ جس قوم کے پاس بھی اس کا رسُول آیا، اُس نے اُسے جھُٹلایا، اور ہم ایک کے بعد ایک قوم کو ہلاک کرتے چلے گئے حتٰی کہ ان کو بس افسانہ ہی بنا کر چھوڑا۔۔۔۔ پِھٹکار اُن لوگوں پر جو ایمان نہیں لاتے! ¹

پھر ہم نے موسیٰؑ اور اس کے بھائی ہارونؑ کو اپنی نشانیوں اور کھُلی سَنَد ¹ کے ساتھ فرعون اور اس کے اَعیانِ سلطنت کی طرف بھیجا

مگر انہوں نے تکبّر کیا اور بڑی دوں کی لی۔ ¹

کہنے لگے”کیا ہم اپنے ہی جیسے دو آدمیوں پر ایمان لے آئیں؟ ¹ اور آدمی بھی وہ جن کی قوم ہماری بندی ہے۔“ ²

پس اُنہوں نے دونوں کو جھُٹلایا اور ہلاک ہونے والوں میں جا ملے۔ ¹

اور موسٰیؑ کو ہم نے کتاب عطا فرمائی تاکہ لوگ اس سے رہنمائی حاصل کریں

اور ابنِ مریمؑ  اور اس کی ماں کو ہم نے ایک نشان بنایا ¹ اور ان کو ایک سطحِ مُرتَفَع پر رکھا جو اطمینان کی جگہ تھی اور چشمے اس میں جاری تھے۔ ²

اے پیغمبرو، ¹ کھاوٴ پاک چیزیں اور عمل کرو صالح، ² تم جو کچھ بھی کرتے ہو، میں اس کو خُوب جانتا ہوں