22. سورہ الحج

کیا تم دیکھتے نہیں ہو کہ اللہ کے آگے سر بسجُود ہیں ¹ وہ سب جو آسمانوں میں ہیں ² اور جو زمین میں ہیں؟ سُورج اور چاند اور تارے اور پہاڑ اور درخت اور جانور اور بہت سے انسان ³ اور بہت سے وہ لوگ بھی جو عذاب کے مستحق ہو چکے ہیں۔ ⁴ اور جسے اللہ ذلیل و خوار کردے اُسے پھر کوئی عزّت دینے والا نہیں ہے ⁵ ، اللہ کرتا ہے جو کچھ چاہتا ہے۔ ⁶

یہ دو فریق ہیں جن کے درمیان اپنے ربّ کے معاملے میں جھگڑا ہے۔ ¹ اِن میں سے وہ لوگ جنہوں نے کُفر کیا اُن کے لیے آگ کے لباس کاٹے جا چکے ہیں، ² اُن کے سروں پر کھَولتا ہوا پانی ڈالا جائے گا

جس سے اُن کی کھالیں ہی نہیں پیٹ کے اندر کے حصے تک گل جائیں گے

اور اُن کی خبر لینے کے لیے لوہے کے گُرز ہوں گے

جب کبھی وہ گھبرا کر جہنّم سے نکلنے کی کوشش کریں گے پھر اُسی میں دھکیل دیے جائیں گے کہ چکھو اب جلنے کی سزا کا مزا

(دُوسری طرف)جو لوگ ایمان لائے اور جنہوں نے نیک عمل کیے اُن کو اللہ ایسی جنتّوں میں داخل کرے گا جِن کے نیچے نہریں بہ رہی ہوں گی۔ وہاں وہ سونے کے کنگنوں اور موتیوں سے آراستہ کیے جائیں گے ¹ اور ان کے لباس ریشم کے ہوں گے

ان کو پاکیزہ بات قبول کرنے کی ہدایت بخشی گئی ¹ اور انھیں خدائے ستودہ صفات کا راتہ دکھایا گیا۔ ²

جن لوگوں نے کُفر کیا ¹ اور جو (آج)اللہ کے راستے سے روک رہے ہیں اور اُس مسجدِ حرام کی زیارت میں مانع ہیں ² جسے ہم نے سب لوگوں کے لیے بنایا ہے، جس میں مقامی باشندوں اور باہر سے آنے والوں کے حقوق برابر ہیں ³ (اُن کی روِش یقیناً سزا کی مستحق ہے)۔ اِس (مسجدِ حرام)میں جو بھی راستی سے ہٹ کر ظلم کا طریقہ اختیار کرے گا ⁴ اسے ہم دردناک عذاب کا مزا چکھائیں   گے

یاد کرو وہ وقت جبکہ ہم نے ابراہیمؑ کے لیے اِس گھر (خانہ کعبہ)کی جگہ تجویز کی تھی اِس  ہدایت کے ساتھ)کہ ”میرے ساتھ کسی چیز کو شریک نہ کرو، اور میرے گھر کو طواف کرنے والوں اور قیام و رکوع و سجود کرنے والوں کے لیے پاک رکھو، ¹