25. سورہ الفرقان

اے محمدؐ ، تم سے پہلے جو رسُول بھی ہم نے بھیجے تھے وہ سب بھی کھانا کھانے والے اور بازاروں میں چلنے پھرنے والے لوگ ہی تھے۔ ¹ دراصل ہم نے تم لوگوں کو ایک دُوسرے کے لیے آزمائش کا ذریعہ بنا دیا ہے۔ ² کیا تم صبر کرتے ہو؟ ³ تمہارا ربّ سب کچھ دیکھتا ہے۔ ⁴

جو لوگ ہمارے حضور پیش ہونے کا اندیشہ نہیں رکھتے وہ کہتے ہیں”کیوں نہ فرشتے ہمارے پاس بھیجے  جائیں؟ ¹ یا پھر ہم اپنے رب کو دیکھیں۔ ²“بڑا گھمنڈ لے بیٹھے یہ اپنے نفس میں ³ اور حد سے گزر گئے یہ اپنی سر کشی میں

جس روز یہ فرشتوں کو دیکھیں گےوہ مجرموں کے لیے کسی بشارت کا دن نہ ہو گا ¹ ، چیخ اُٹھیں گے کہ پناہ بخدا

اور جو کچھ بھی ان کا کیا دھرا ہے اُسے لے کر ہم غبار کی طرح اُڑا دیں گے۔ ¹

بس وہی لوگ جو جنّت کے مستحق ہیں اُس دن اچھی جگہ ٹھہریں گے اور دوپہر گزارنے کو عمدہ مقام پائیں گے۔ ¹

آسمان کو چیرتا ہوا ایک بادل اس روز نمودار ہو گا اور فرشتوں کے پرے کے پرے اتار دیے جائیں گے

اُس روز حقیقی بادشاہی صرف رحمٰن کی ہوگی۔ ¹ اور وہ منکرین کے لیے بڑا سخت دن ہوگا

ظالم انسان اپنا ہاتھ چبائے گا اور کہے گا "کاش میں نے رسول کا ساتھ دیا ہوتا

ہائے میری کم بختی، کاش میں نے فلاں شخص کو دوست نہ بنایا ہوتا