29. سورہ العنكبوت

اور جب ہمارے فرستادے ابراہیمؑ کے پاس بشارت لے کر پہنچے¹ تو انہوں نے اُس سے کہا”ہم اِس بستی کے لوگوں کو ہلاک کرنے والے ہیں،²  اس کے لوگ سخت ظالم ہو چکے ہیں۔“

ابراہیمؑ نے کہا”وہاں تو لُوطؑ موجود ہے۔“¹ انہوں نے کہا”ہم خوب جانتے ہیں کہ وہاں کون کون ہے۔ ہم اُسے ، اور اُس کی بیوی کے سوا اس کے باقی گھر والوں کو بچا لیں گے۔“ اس کی بیوی پیچھے رہ جانے والوں میں سے تھی۔²

پھر جب ہمارے فرستادے لُوطؑ کے پاس پہنچے تو ان کی آمد پر وہ سخت پریشان اور دل تنگ ہوا۔¹ اُنہوں نے کہا”نہ ڈرو اور نہ رنج کرو۔² ہم تمہیں اور تمہارے گھر والوں کو بچا لیں گے ، سوائے تمہاری بیوی کے جو پیچھے رہ جانے والوں میں سے ہے

ہم اس بستی کے لوگوں پر آسمان سے عذاب نازل کرنے والے ہیں اُس فسق کی بدولت جو یہ کرتے رہے ہیں"

اور ہم نے اُس بستی کی ایک کھُلی نشانی چھوڑ دی ہے¹ اُن لوگوں کے لیے جو عقل سے کام لیتے ہیں۔²

اور مَدیَن کی طرف ہم نے اُن کے بھائی شعیبؑ کو بھیجا۔¹ اُس نے کہا”اے میری قوم کے لوگو، اللہ کی بندگی کرو اور روزِ آخر کے اُمیدوار رہو² اور زمین میں مفسد بن کر زیادتیاں نہ کرتے پھرو۔“

مگر انہوں نے اسے جھُٹلا دیا۔¹ آخر کار ایک سخت زلزلے نے انہیں آلیا اور وہ اپنے گھروں میں² پڑے کے پڑے رہ گئے

اور عاد و ثمود کو ہم نے ہلاک کیا، تم وہ مقامات دیکھ چکے ہو جہاں وہ رہتے تھے۔¹ اُن کے اعمال کو شیطان نے اُن کے لیے خوشنما بنا دیا اور انہیں  راہِ راست سے برگشتہ کر دیا حالانکہ وہ ہوش گوش رکھتے تھے۔²

اور قارون و فرعون و ہامان کو ہم نے ہلاک کیا۔ موسیٰؑ اُن کے پاس بیّنات لے کر آیا مگر انہوں نے زمین میں اپنی بڑا ئی کا  زعم کیا حالانکہ وہ سبقت لے جانے والے نہ تھے۔¹