78. Surah An-Naba, Urdu Translation

اس بڑی خبر کے بارے میں۔

جس کے بارے میں یہ اختلافِ رائے میں مبتلا ہوگئے ہیں۔

نہیں ! عنقریب یہ جان لیں گے۔

ہاں کوئی بات نہیں ! عنقریب یہ جان لیں گے۔

کیا ہم نے نہیں بنا دیا زمین کو بچھونا ؟

اور پہاڑوں کو میخیں ؟

اور تمہیں ہم نے جوڑوں کی شکل میں پیدا کیا۔

اور تمہاری نیند کو بنا دیا ہم نے تھکان دور کرنے والی۔

اور رات کو ہم نے بنا دیا ڈھانپ لینے والی۔

اور دن کو ہم نے بنا دیا معاش (کی جدوجہد) کے لیے۔

اور تمہارے اوپر بنا دیے ہم نے سات مضبوط آسمان۔

اور ہم نے (سورج کو) بنا دیا ایک روشن چراغ۔

اور ہم نے اتار دیا نچڑنے والی بدلیوں سے چھاجوں پانی۔

تاکہ اس کے ذریعے سے ہم نکالیں اناج اور دوسرے نباتات۔

اور بڑے گھنے باغات بھی۔

یقینا فیصلے کا دن ایک معین وقت ہے۔

جس دن پھونکا جائے گا صور میں تو تم سب چلے آئو گے فوج در فوج۔

اور آسمان کھول دیا جائے گا تو اس میں دروازے ہی دروازے بن جائیں گے۔

اور پہاڑ چلا دیے جائیں گے تو وہ ہوجائیں گے چمکتی ہوئی ریت۔

یقینا جہنم گھات میں ہے۔

وہ ٹھکانہ ہے سرکش لوگوں کا۔

وہ رہیں گے اس میں قرن ہا قرن۔

وہ نہیں چکھیں گے اس میں کوئی ٹھنڈی شے اور نہ کوئی مشروب۔

سوائے کھولتے ہوئے پانی اور بہتی ہوئی پیپ کے۔

بدلہ (ان کے اعمال کا) پورا پورا۔

یہ لوگ کسی حساب کتاب کی کوئی توقع نہیں رکھتے تھے۔

اور انہوں نے جھٹلا دیا تھا ہماری آیات کو دھڑلے ّکے ساتھ۔

اور ہم نے تو ہرچیز کو گن گن کر لکھ رکھا ہے۔

تو اب چکھو ! ہم ہرگز اضافہ نہیں کریں گے تمہارے لیے مگر عذاب ہی میں۔

یقینا اہل ِتقویٰ کے لیے کامیابی ہوگی۔

(ان کے لیے) باغ اور انگور ہوں گے۔

اور نوجوان ہم عمر بیویاں۔

اور جام چھلکتے ہوئے۔

وہ نہیں سنیں گے اس میں کوئی لغو بات اور نہ جھوٹ۔

یہ بدلہ ہوگا آپ کے رب کی طرف سے دیا ہوا حساب سے۔

جو رب ہے آسمانوں کا اور زمین کا اور جو کچھ ان کے مابین ہے جو الرحمن ہے۔ ان (میں سے کسی) کو ہمت نہیں ہوگی اس سے بات کرنے کی۔

جس دن کھڑے ہوں گے جبرائیل اور تمام فرشتے صفیں باندھے۔ وہ کوئی بات نہ کرسکیں گے سوائے اس کے جسے رحمن کی طرف سے اجازت مل جائے اور وہ بات بھی درست کرے۔

یہ دن حق ہے ! تو جو چاہے اپنے رب کی طرف اپنا ٹھکانہ بنا لے۔

دیکھو ! ہم نے تو تمہیں خبردار کردیا ہے اس عذاب سے جو بالکل قریب ہے۔ جس دن انسان دیکھ لے گا جو اس کے دونوں ہاتھوں نے آگے بھیجا تھا اور کافر کہے گا : کاش کہ میں مٹی ہوتا !