وَ یَتُوۡبُ اللّٰہُ عَلٰی مَنۡ یَّشَآءُ
'اور وہ جس کی طرف چاہتا ہے رحمت سے توجہ فرماتا ہے'
یتوب لفظ 'توبہ' سے نکلا ہے جس کے معنی لوٹنا/ رجوع کرنا ہیں۔ ہماری عام زبان میں اسے توبہ کرنا سمجھا جاتا ہے، اصل میں توبہ کرنا ہوتا کیا ہے؟ گذشتہ گناہوں یا غلطیوں پر ندامت اور آئندہ اس قسم کی برائی یا گناہ نہ کرنے کا اقرار۔ یعنی ہم واپس لوٹنا چاہتے ہیں پہلی حالت میں۔ ہم گناہ کی گندگی کواتار کر واپس پچھلی حالت میں لوٹنا چاہتے ہیں۔ یہ ہے ایک بشر کے لیے 'یتوب'کا معنی۔
لیکن جب یہی لفظ اللہ تعالی کی ذات کے ساتھ استعمال ہوتا ہے تو اسکا مطلب ہو جاتا ہے توبہ کی توفیق دینا، رحمت کا پھیرا ڈالنا، اللہ تعالی کا اپنے بندے کی طرف نظرِرحمت فرمانا۔ اور یوں اس آیت کا مطلب ہوگا 'اور اللہ تعالی توبہ کی توفیق دیتا ہے جسے وہ چاہتا ہے'
اور اللہ تعالی ہر ایک کو توبہ کی توفیق نہیں دیتا جس پر اسکا رحم کرنے کا ارادہ ہوگا صرف اسے توبہ کی توفیق ہوگی۔ اس لیے اٹھتے، بیٹھتے، چلتے پھرتے توبہ کیا کریں،استغفار کیا کریں کیاپتا کونسی قبولیت کی گھڑی ہو اور اللہ تعالی آپ پر نظرِ رحمت فرما دیں اور آپکی فریاد بارگاہ الٰہی میں سُنی جائے۔
اگر آپکو توبہ کی توفیق ملتی رہتی ہے تو آپ خوش قسمت ہیں 
کیونکہ ہر ایک کو توبہ کی توفیق نہیں ملتی یہ صرف اسکو ملتی ہے جسکا 'وہ' چاہتا ہے۔ اس لیے آج ہی خود کو جج کریں کہ دن میں کتنی بار آپ استغفار کرتے ہیں؟ اگر نہیں کرتے یا بھول جاتے ہیں تو دعا کیا کریں کہ اللہ آپکو توبہ کی توفیق دے کیونکہ توبہ اللہ کی رحمت ہے ، وہ اپنی رحمت کا پھیرا اس پر ڈالتا ہے جس پر وہ چاہتا ہے۔
اللہ تعالی ہم سبکو اپنی رحمت میں لیکر ہماری توبہ کو قبول فرمائے۔ آمین