ایک نوجوان قیدی تھا، دہشتگردی کے جھوٹے الزام میں جیل میں ڈال دیا گیا۔
باپ کی آخری سانس کی خبر تک نہ پہنچی، ماں دل کے دورے سے گئی، اور چھوٹے بہن بھائی گلی گلی سوالی بن گئے۔
اس کے دن گنتی میں تھے، اور جیل کی دیواروں سے ٹپکتی نمی میں وہ چیختی تھی:
 'یا اللہ! تُو کہاں ہے؟ میں نے کیا گناہ کیا؟ کیوں چھین لیا سب کچھ؟'
اسی اندھیرے میں ایک دن، قرآن کا نسخہ ایک قیدی ساتھی سے ملا، جو کہتا تھا:
 'لے... یہ لے، اس میں جواب ہے۔'
اس نے بے دلی سے کھولا — اور پہلی بار نظریں ٹھہریں اس آیت پر:
 'فَإِنَّ مَعَ الْعُسْرِ يُسْرًا'
(بے شک تنگی کے ساتھ آسانی ہے۔)
وہ ہنسا، طنزیہ، جیسے کہتا ہو:
'یہ کیسی آسانی ہے؟ دیواریں؟ زنجیریں؟ گمنامی؟ موت؟'
مگر اس دن کے بعد روز وہی آیت پڑھتا، روتا، چیختا، اور پھر خاموش ہو جاتا۔
تین سال بعد، اچانک نئے ثبوت ملے، اور وہ بری ہوگیا۔
مگر اب وہ وہی نہ تھا۔
جیل سے باہر نکلا تو لوگ حیران تھے — چہرے پر نور، دل میں سکون، اور زبان پر بس یہی:
 'میں جیل میں نہیں گیا تھا، میں اللہ کے قریب گیا تھا...
عسر نے مجھے ٹکڑے کیا، مگر یسر نے مجھے دوبارہ جوڑا —
اور اس بار میں صرف انسان نہیں، میں مؤمن بن کر نکلا ہوں۔'
تدبر:

قرآن کہتا ہے:

 فَإِنَّ مَعَ الْعُسْرِ يُسْرًا
'بے شک تنگی کے ساتھ ہی آسانی ہے۔'



یہاں دو الفاظ خاص غور طلب ہیں:

'مَعَ' (ساتھ): مطلب یہ نہیں کہ آسانی بعد میں آئے گی، بلکہ ساتھ ساتھ چل رہی ہوتی ہے۔

'الْعُسْرِ' (تنگی): معرفہ ہے، یعنی خاص، ایک مخصوص تنگی۔

'يُسْرًا' (آسانی): نکرہ ہے، یعنی غیر مخصوص — مطلب یہ کہ ہر ایک تنگی کے ساتھ کئی آسانیاں چھپی ہو سکتی ہیں۔


یہ اللہ کا وعدہ ہے، اور اللہ وعدہ خلافی نہیں کرتا۔
ہم اکثر صرف 'عسر' کو دیکھتے ہیں، اسے محسوس کرتے ہیں، اور وہی ہمارے دل پر چھا جاتا ہے۔ مگر 'یسر' — وہ ہمارے صبر، شکر، اور تدبر کے بعد ہی نظر آتا ہے۔
کبھی یہ آسانی کسی انسان کی شکل میں آتی ہے، کبھی ایک موقع بن کر، اور کبھی دل کے سکون کی صورت۔


 'مجھے لگا میں ٹوٹ گئی ہوں... پر اصل میں میں دوبارہ جوڑی جا رہی تھی — زیادہ بہتر انداز میں۔'

عسر وہ مٹی ہے جس میں اللہ یسر کا بیج بوتا ہے۔ ہم جب صبر سے پانی دیتے ہیں، تو وہ پھوٹتا ہے، اگتا ہے، اور ہمیں وہ پھل دیتا ہے جو صرف درد میں پکتا ہے — پختگی، شعور، قربِ الٰہی۔
یہ آیت صرف الفاظ نہیں، یہ ایک زندگی گزارنے کا وعدہ ہے۔
جب سب کچھ چھن جائے، تب یہی وعدہ ہمیں تھامتا ہے۔
جب آنکھ کے آنسو خشک ہوں، تب یہی الفاظ دل کو پانی دیتے ہیں۔
 عسر وہ کوٹھڑی ہے جس کے باہر یسر سورج بن کر انتظار کرتا ہے۔
شرط صرف اتنی ہے کہ دروازہ صبر سے کھولنا ہے۔
    

گزشتہ روز میری بہت عزیز دوست نے مجھ سے سوال پوچھا۔ اس سوال کو پڑھ کر مجھے اس کے پیچھے کی سائیکالوجی سمجھ آئی کہ اس نے یہ کیوں پوچھا ہے یا ایسا خیال اس کے دماغ میں کیسے آیا۔ کچھ سوالوں کا جواب میں بہت مختصر دیتی ہوں تاکہ اگلا کنفیوز ہو کر بھاگ نہ جائے لیکن کبھی کبھار وضاحت زیادہ بہتر ہوتی ہے اور یہ ویسا ہی موقع تھا۔ پہلے تو میں نے اسے مختصر سا حل بتایا کہ ایسا کرو، ٹھیک ہو جائے گا ۔ اور پھر اسے تجویز دی کہ اتنی ہی کوشش کرنا جتنا میں نے کہا اس سے زیادہ مت سوچنا اگر کوئی خیال آئے تو اگنور کرنا اور سمجھایا کہ کبھی کبھار ہم کچھ چیزوں کو بہت گہرائی میں سوچتے ہیں جس کی ضرورت نہیں ہوتی بلکہ وہ ہماری زندگیوں کو خوامخواہ مشکل بناتی ہے۔  کل اس نے مجھ سے کہا 'ویسا ہی تھا جیسا آپ نے کہا تھا، بہت شکریہ'. 

کچھ چیزیں مجھے بہت اچھے سے سمجھ آتی ہیں کیونکہ ہلکی آنچ پر تجربہ ہوتا ہے۔ اللہ تعالیٰ میرے بہت بہترین استاد ہیں، وہ مجھے بہت پیار اور شفقت سے ایک راستے سے گزارتے ہیں اور بہت اچھے سے سکھاتے ہیں۔ جو سوال میری دوست نے پوچھا تھا ایک عرصہ تک ۔میرے ذہن میں بھی تھا۔ اس وقت میں نے بہت آرٹیکل پڑھے، گھنٹوں یوٹیوب پر گزارے۔ علم ہونے کے باوجود اس بات کو مکمل طور پر سمجھنے اور عملی زندگی پر لاگو کرنے میں بہت وقت لگا۔ اکثر ایک ہی ہدف ہوتا ہے کچھ آسانی سے عبور کرتے ہیں باقیوں کو تھوڑی زیادہ محنت درکار ہوتی ہے۔ پتہ ہے ایسا کیوں ہوتا ہے – guess کریں۔ اچھا بتاتی ہوں، صبر! کیونکہ اللہ تعالیٰ آپ کو کسی کا استاد بنانا چاہتے ہیں، کسی کے زخموں کا مرحم، کسی کے ٹوٹے دل کا سہارا۔ ایک استاد کو ہر بات پتہ ہوتی ہے – سوال، فارمولا، طریقہ، اس کے پیچھے کی سائنس، مثالیں اور کس کس طرح سے یہ سوال نہیں کرنا۔ اور استاد کو یہ آسانی سے نہیں معلوم ہوتا، پاپڑ بیلنے پڑتے ہیں ۔

ایک کی مشکل کسی دوسرے کی آسانی ہوتی ہے۔ بے شک ہر مشکل کے ساتھ آسانی ہے، ہو سکتا ہے کہ ویسی آسانی نہ ہو جو آپ سمجھ سکیں، شاید کسی اور صورت میں ہو۔ 

جیسے کہ: 
1. آسانی کسی کو بات سمجھانے میں۔ 
2. آسانی اس مصیبت کو یاد کر کے شکر ادا کرنے میں۔ 
3. آسانی کسی کو پہلے سے خطرے سے آگاہ کرنے میں۔ 
4.  آسانی کے اتنی مشکل سے تو نکلی ہوں واپس نہیں جانا۔ 
5. آسانی جنت میں گھر بنانے میں۔

کچھ مشکلیں بڑی آسانی لاتی ہیں، ایسی آسانیاں جو انفرادی نہیں بلکہ اجتماعی فائدہ دیتی ہیں۔ اگر ایک انسان کو اپنا یا اپنے کسی عزیز کا علاج کرنے میں مشکل آئی اور اس نے پورا ہسپتال بنایا تو اس کی ایک تکلیف کتنوں کے لیے راحت بنی۔ کوئی اپنی تعلیم مکمل نہیں کر پایا لیکن اس نے بڑے ہو کر کچھ بچوں کی تعلیم سپانسر کر دی تو اس کا غم کتنوں کیلئے سکون بن گیا۔ کسی نے یتیمی میں زندگی گزاری تو دوسرے یتیم بچوں کے دکھ کو سمجھا اور انھیں والدین جیسی شفقت دی، کسی کی محرومی نے دوسروں کی خلا پر کردی۔ 

یہ تو ہمارا دیکھنے کا زاویہ ہے کہ کس طرح ہم اپنی مشکلوں کی سیڑھیوں پر چڑھ کر دوسروں کیلئے ہموار راستہ بنا سکتے ہیں۔ اور کسی دوسرے کی آسانی میں اپنی دنیا و آخرت کی آسانی کما سکتے ہیں۔ 

اللہ آپ کو اپنی ہدایت اور کامیابی سے نوازے، آپ کی ہر کوشش میں برکت دے اور آپ کے دل میں جو محبت اور شفقت ہے، وہ ہمیشہ برقرار رکھے۔ آمین!

تکلیف میں چھپی ہوئی ایک رحمت (از خود دل سے نکلی ہوئی ایک بات)

تکلیف بذاتِ خود اللہ تعالیٰ کی طر ف سے ایک رحمت ہے۔ اکثر لوگ تکلیف کو محض ایک مصیبت سمجھتے ہیں، لیکن درحقیقت یہ بھی اللہ تعالیٰ کی ایک نعمت ہے۔ جب اللہ تعالیٰ کسی بندے کو آزماتا ہے تو اس کے ساتھ آسانی کا سامان بھی کرتا ہے۔ کیونکہ اللہ کا وعدہ ہے:

﴿إِنَّ مَعَ الْعُسْرِ يُسْرًا ‎۝٥ إِنَّ مَعَ الْعُسْرِ يُسْرًا ‎۝٦﴾
(بے شک ہر تنگی کے ساتھ آسانی ہے، بے شک ہر تنگی کے ساتھ آسانی ہے)
📖 سورۃ الشرح، آیت 5-6

اللہ تعالیٰ ہمارے لیے وہ چیزیں پسند کرتا ہے جو ہمارے ایمان، صبر، اور قربِ الٰہی میں اضافہ کا ذریعہ بنیں، اور تکلیف انہی میں سے ایک ذریعہ ہے۔

ایک انگلش مفکر نے بہت بامعنی بات کہی تھی:
'تکلیف اللہ کا مائیکروفون ہے، جس کے ذریعے وہ ایک غافل دنیا کو جگاتا ہے۔'
یعنی جب دنیا کی چمک دمک، مصروفیات اور خوشیاں ہمیں اللہ سے غافل کر دیتی ہیں، تو اللہ کبھی کبھی دکھ کے ذریعے ہمیں جگاتا ہے، جھنجھوڑتا ہے، تاکہ ہم واپس اس کی طرف پلٹ آئیں۔ ایک بار اس مفکر کی زندگی میں ایک شدید صدمہ آیا، جب اس کی بیوی کینسر کے باعث دنیا سے چلی گئیں۔ اس دکھ نے اسے اللہ کی طرف رجوع پر مجبور کر دیا اور وہ کہنے لگا:
'تکلیف نے مجھے وہ چیزیں سکھائیں جو نہ کسی کتاب نے، نہ کسی استاد نے اور نہ ہی کسی نصیحت نے۔'
یہ واقعہ ہمیں سکھاتا ہے کہ بعض اوقات اللہ تعالیٰ ہمارے دل کے پردے صرف تکلیف کے ذریعے ہی ہٹا دیتا ہے تاکہ ہم اس کی پہچان حاصل کر سکیں۔

جیسا کہ قرآن مجید میں اللہ تعالیٰ فرماتا ہے:

﴿وَلَنُذِيقَنَّهُم مِّنَ ٱلْعَذَابِ ٱلْأَدْنَىٰ دُونَ ٱلْعَذَابِ ٱلْأَكْبَرِ لَعَلَّهُمْ يَرْجِعُونَ﴾
(اور ہم انہیں بڑے عذاب سے پہلے، چھوٹے عذاب کا مزہ چکھائیں گے، شاید وہ رجوع کر لیں)
📖 سورۃ السجدہ، آیت 21

ایک نیک خاتون نے بہت خوبصورت بات کہی:
'جب بھی مجھے کوئی تکلیف ہوتی ہے، میں فوراً اللہ سے دعا کرتی ہوں: اے اللہ! اس تکلیف میں میرے لیے آسانی دکھا دیجیے۔'
اور واقعی، ایسا ہوتا بھی ہے کہ کچھ نہ کچھ ایسا ضرور سامنے آتا ہے جو دل کو سکون دیتا ہے۔ کبھی کوئی پیارا جملہ، کبھی کسی بچے کی معصوم بات، کبھی کسی عزیز کی تسلی، یا کبھی موبائل پر کوئی ایسا پیغام جو دل کو چھو جائے — یہ سب اللہ کی طرف سے بھیجے گئے اشارے ہوتے ہیں، جو دل کو اطمینان اور روح کو قرار بخشتے ہیں۔ جیسا کہ اللہ تعالیٰ فرماتا ہے:

﴿وَعَسَىٰٓ أَن تَكْرَهُوا۟ شَيْـًۭٔا وَهُوَ خَيْرٌۭ لَّكُمْ﴾
(ہو سکتا ہے تم کسی چیز کو ناپسند کرو، حالانکہ وہ تمہارے لیے بہتر ہو)
📖 سورۃ البقرہ، آیت 216

جب انسان اللہ کی دی ہوئی ہدایت کے نور سے دیکھتا ہے تو وہ تکلیف میں بھی خیر تلاش کر لیتا ہے۔ وہ دل سے کہتا ہے: 'یہ آزمائش بھی میرے رب کی طرف سے ہے، اور میرے رب کی رحمت میری تکلیف سے زیادہ بڑی ہے۔' جیسا کہ اللہ تعالیٰ فرماتا ہے:

﴿مَّآ أَصَابَ مِن مُّصِيبَةٍ إِلَّا بِإِذْنِ ٱللَّهِ ۗ وَمَن يُؤْمِنۢ بِٱللَّهِ يَهْدِ قَلْبَهُۥ ۚ﴾
(کوئی بھی مصیبت نہیں آتی مگر اللہ کے حکم سے، اور جو اللہ پر ایمان رکھتا ہے، اللہ اس کے دل کو ہدایت دیتا ہے)
📖 سورۃ التغابن، آیت 11

پس یہ سچ ہے کہ تکلیف ظاہری طور پر دکھ دیتی ہے، لیکن حقیقت میں وہ انسان کو اس کے رب کے قریب کرتی ہے، اسے جھکنا سکھاتی ہے، دعا کرنا سکھاتی ہے، اور وہ اطمینان عطا کرتی ہے جو صرف اللہ کی یاد میں ملتا ہے۔ اللہ تعالیٰ ہمیں ہر تکلیف میں خیر، صبر، اور اپنی رحمت کی جھلک دکھا دے۔
آمین یا رب العالمین،

بسم الله والصلاة والسلام على رسول الله أما بعد:

یہ یاددہانی سب سے پہلے خود کو، پھر دوسروں کو۔۔۔

اللہ تعالیٰ نے سورۃ الشرح میں دو مرتبہ یہ حقیقت بیان فرمائی:

إِنَّ مَعَ الْعُسْرِ يُسْرًا، إِنَّ مَعَ الْعُسْرِ يُسْرًا
یقیناً ہر تنگی کے ساتھ آسانی ہے، ہر تنگی کے ساتھ آسانی ہے۔

مگر ہم نے خود کو اس قدر آرام پسندی کا عادی بنا لیا ہے کہ کسی جدوجہد کو سہنا، کسی تکلیف کو برداشت کرنا ہمارے لیے ناقابل تصور بن گیا ہے۔ علامہ اقبال نے کیا خوب کہا تھا:

تیرے صوفے ہیں افرنگی، تیرے قالین ہیں ایرانی
لہو مجھ کو رُلاتی ہے جوانوں کی تن آسانی

اور ایک اور مقام پر اُنہی جذبات کو کچھ یوں بیان کیا:

ہر کوئی مستِ مئے ذوقِ تن آسانی ہے
تم مسلمان ہو؟ یہ اندازِ مسلمانی ہے؟


یہی تو وہ روش ہے جس نے ہمارے عزم کو کمزور کر دیا، ہمارے خوابوں کو محدود کر دیا، اور ہمارے ارادوں کو بکھیر کر رکھ دیا۔ ہم چاہتے ہیں کہ ہر کام آسان ہو، ہر منزل قریب ہو، اور ہر سفر ہموار ہو۔ مگر اللہ تعالیٰ نے فرمایا ہے کہ آسانی ہمیشہ تنگی کے ساتھ آتی ہے۔ پہلے مشقت، پھر راحت۔ پہلے پسینہ، پھر کامیابی۔

یہ سوچ ہمیں ناامید نہیں کرتی بلکہ ہمت دلاتی ہے کہ اگر آج مشکلات ہیں، تو کل ان کا حل بھی ہوگا۔ اگر آج سختی ہے، تو کل نرمی بھی آئے گی۔ اگر ہم اپنے کمفرٹ زون سے نکل کر تھوڑی محنت کریں، تو اللہ کے وعدے کے مطابق آسانی ہمارا مقدر ہوگی۔

یہ یاد دہانی ہے کہ اگر ہم کچھ بڑا حاصل کرنا چاہتے ہیں، تو ہمیں اپنی آسانیوں کی نیند سے بیدار ہونا ہوگا۔ ہمیں مشقت کا سامنا کرنا ہوگا، لیکن یقین رکھیں کہ یہ وقتی آزمائشیں ہیں، مستقل مشکلات نہیں۔ ہر جدوجہد کے بعد اللہ کی طرف سے ایسی آسانی آتی ہے جو دل کو خوشی اور روح کو تسکین دے دیتی ہے۔

تو آئیں، اپنے آرام پسندی کے خول سے باہر نکلیں، خواب دیکھیں، محنت کریں، اور اللہ کی مدد پر بھروسہ رکھیں۔ یقیناً وہ ہمیں مایوس نہیں کرے گا۔

Wa iyyakum. Thank you for reading every reflection and dropping the comments 

حالات وقت کے تابع نہیں ہوتے کچھ دن ایسے آئیں گے جہاں آپ کو لگے گا کہ سب کچھ بے اثر ہے۔۔!
آپکے اِیموشنز اور فِیلنگز اُن ناکارہ بادلوں کی طرح ہونا چاہیں گے جو ہر حال میں برسنا جانتے ہوں۔۔!
یہ بادل پانی سے بھر چکے ہیں۔!.
ہوا اِنکو کھینچ کر کہیں اور لے جانے کے در پہ ہے۔۔!
لیکن یہ ایک جگہ رک گئے ہیں۔!
ضد سے..!
مان سے..!
امید سے..!
یوں۔۔
کہ برسنا اسی جگہ ہے..!
اوراجازت۔۔؛
گویا اوپر سے روک دی گئی ہے۔!
تکرار تو جاری ہے, لیکن نتیجہ آنے میں وقت ہے۔!!
ہاں۔۔۔
روۓ زمین پر رہنے والے مکین اس آس پہ شکرانے کا میلا لگاۓ بیٹھے ہیں کہ بادل برسیں گے اور پھر سب بہتر ہو جائے گا۔۔!!
زندگی کے خُشک موسم کے اندر بہار کا پہلا قدم رکھ دیا جائے گا۔۔!
خَزاں کی شِدت سے لاغُر پیڑ جو ٹہنی بن کر ٹوٹنے کے در پر ہیں..؛
نئی کونپلیں نکالنے لگیں گے۔۔!!
 خُشک آنکھیں اب پُرنم ہونے کو ہیں۔۔!!
ویران چہروں کی رونق واپس آنے کو بے تاب ہے۔۔!
جَلد یا بدیر یہی رحمت کی بارش آپکی دہلیز پر ہو گی۔۔!
اگر دن بے اثر ہیں تو رحمت بھی مہمان آنے کو ہے۔۔۔!
اپنی بے رونق آنکھوں میں دعا،امید اور توکَل کے جُگنو ڈھونڈنا شروع کر دیں آپ۔۔!
کہ رب تعالیٰ نے اپنے اِنہی جگنوؤں کے ذریعے ہی آپکے چہرے کو روشن کر کے لوگوں کی زندگی میں نور بھرناہے۔۔۔!

ان آیات کو حضرت یوسف علیہ السلام کی مثال سے بیان کرنا چاہوں گا۔ حضرت یوسف علیہ السلام اپنے والد حضرت یعقوب علیہ السلام کے لاڈلے بیٹے تھے، لیکن ان کے بھائی جب ان کو لے کر گئے اور کنویں میں ڈال دیا تو ان پر بظاہر تنگی آ گئی، ایک بڑی آزمائش کا سامنا تھا۔ کنویں میں، یوسف علیہ السلام کا بھروسہ اللہ کی ذات پر تھا، کیونکہ اللہ نے انہیں ان کے بلند مقام کی بشارت دی تھی۔

پھر اللہ کی مدد کے ظہور کے طور پر ایک قافلہ آ گیا، اور جب قافلے والوں نے انہیں کنویں سے نکالا تو یہ ایک نئی صورتِ حال تھی۔ لیکن ایک اور آزمائش کا سامنا ہوا کہ قافلے والوں نے انہیں غلام بنا کر مصر میں فروخت کر دیا۔ اس کے بعد کچھ عرصہ سکون سے گزرا، اور یوسف علیہ السلام کے لیے آسانی کا ایک وقت آیا۔ لیکن پھر عزیزِ مصر کی بیوی نے گناہ کی دعوت دی، اور جب یوسف علیہ السلام نے انکار کیا تو ان پر تہمت لگا دی گئی۔ باوجودیکہ ان کی سچائی ثابت ہو چکی تھی، انہیں زندان میں ڈال دیا گیا۔

تاہم، زندان میں بھی یوسف علیہ السلام نے صبر اور حکمت کا مظاہرہ کیا۔ جب وہ زندان سے نکلے تو رب تعالیٰ نے انہیں اسی ملک کا عزیز بنا دیا جس میں وہ غلام بن کر آئے تھے۔ یہ اللہ کی قدرت کا ایک عظیم مظاہرہ تھا کہ آزمائشوں کے بعد انہیں بلند مقام عطا کیا۔

انسان کی زندگی میں تنگی اور فراخی ساتھ ساتھ آتی ہیں۔ ہمیں ہمیشہ اللہ سے یہی امید رکھنی چاہیے کہ آج تنگی ہے تو کل فراخی ضرور ہوگی، آج مشکل ہے تو کل آسانی ضرور ہوگی۔ کبھی کبھی ہم اللہ سے وہ چیز مانگ رہے ہوتے ہیں جس کے ہم اہل نہیں ہوتے۔ اللہ ہماری دعا سنتا ہے اور ہمیں وہ چیز عطا کرتا ہے، لیکن پہلے ہمیں اس چیز کا اہل بناتا ہے۔

اگر کوئی ایلون مسک اور بل گیٹس کی طرح کامیابی چاہتا ہے تو اللہ اسے ان کی طرح کی مشکلات دے گا۔ اور اگر کوئی ابوبکر و عمر رضی اللہ عنہما کی طرح کامیابی چاہتا ہے تو اللہ اسے ان جیسی آزمائشیں بھی دے گا۔ لیکن کامیابی بھی ویسی ہی دے گا۔

دعا ہے کہ اللہ سب کو دین کا راستہ عطا کرے اور دونوں جہاں کی کامیابی نصیب فرمائے۔ آمین۔

#inspiredbyYusuf #YusufTaughtMe

ہر صبح روشنی اور امید کا پیغام لے کر نہیں آتی۔! 
ہر صبح میں قوت نہیں ہوتی۔! 
بعض صبحیں رات کے گھناؤنے اندھیروں سے زیادہ خطرناک ہؤا کرتی ہیں۔۔!
ایسی بھاری کے دل کا وزن پورے جسم پر ڈال دیں۔۔!!
خوفناک ایسی کے زندہ دفن کر دیں۔۔!
ایسی وحشت زدہ کہ اپنی ویرانیوں سے اجاڑ چمن کو بھی مات دے دیں۔۔!!
اور مایوس یوں کہ صرف اندھیرے کا دور دورہ ہو۔۔! 
لیکن ۔۔
ہمت نہیں ہارنی ۔۔
کیونکہ وقت دہلیز پار کر جائے گا۔۔! 
رہ جائے گا تو وہ صبر جو ایسے حالات میں کیا تھا۔۔!! 
اور وہ شکر جو زبان سے ادا ہؤا تھا۔۔
جو اہم ہے وہ خود شناسی ہے۔۔! 
اور اُس ذات کی نظرِ کرم جس کے قبضے میں یہ بے وقعت جان ہے۔۔!!!

آپ کی خوبصورت تحریر پڑھ کر بہت اچھا لگا. ایسی تاریک صبحیں تو آتی ہی ہمارا امتحان لینے کیلئے ہیں کہ کون اس تاریکی میں اپنے رب پر توکل کا دیا جلا کر رکھتا ہے. 

'چند مومن بہادر قوموں کےنام '
بچپن سے ہم سنتے آرہے ہیں اور شاید دیکھتے بھی ۔کہ شام, کشمیر اور فلسطین کے مسلمانوں پر ظلم ہورہا ہے ۔
یہاں تک کہ ہماری آنکھیں یہ سب دیکھنے کے عادی ہوچکی ہے اور کان سننے کے!!!...
 ہم ان کا درد محسوس نہیں کر سکتے ۔ہمارے رویہ کیا ہوتا ہے.......!!
 ویڈیو دیکھی.. افسوس کا اظہار کیا۔...
اور پھرسکرول ڈاؤن کر دیا۔!!
کبھی آپ نے سوچا ہے۔۔۔۔۔
کہ صرف ان مخصوص مسلم ریاستوں پر ہی کیوں اتنے عرصے سے ظلم ہو رہا ہے۔۔؟
 اگر آپ کو وقت ملے !!!!!
 تو کبھی گولیوں سے چِھلنی جسم کو مسکراتے دیکھیں۔!!
 کبھی کسی باپ کو سب کچھ کھو کر کچھ پالینے کی سرور کی کیفیت کو دیکھیں!!!!
 کبھی کسی ماں کی آنکھوں کی ویرانی میں اترنے کے بعد اس ماں کے عزائم سنیں ۔۔!!
 کبھی کسی کے جگرگوشہ کو دشمن کی حراست میں پرجوش ہوتا دیکھیں!!! 
 کب کسی دو سال کی ننھی سی جان کا معصومانہ سوال سنیں۔!! 
 کبھی کسی حوا کی بیٹی کا ان بزدلوں کے سامنے وقار دیکھیں۔!! 
کبھی کسی معصوم فرشتے جیسی صورت رکھنے والے بچے کے چہرے پر غصے کی کیفیت دیکھیں۔!!
بات اب آہوں  اور سسکیوں سے بہت اوپر جا چکی ہے۔ اب یہ وہ قوم اور وہ امت نہیں رہی کہ جس پر مظالم ہوں گے اور یہ مظلومیت کی تصویر بن جائیں گے۔
 اب کی بار بہادری ان کے خون میں شامل اور ہر رگ میں سرایت کر چکی ہے!!
ہم اسے عذاب نہیں کہہ سکتے یہ آزمائش ہے اور امتحان بھی
 اللہ تعالی فرماتے ہیں 
'اور میں کسی کی جان سے بڑھ کر ان پر بوجھ نہیں ڈالتا'
 ان ریاستوں کی عوام کی بہادری!!!
 ان کا ایمان !!!
ان کا صبر!!!
 ان کا اللہ پر توکل!!!
ان کا مسکرا کر شہیدوں کو الوداع کہنا!!!
 ان کی ماؤں کے بلند عزائم!!!
 ان کے بچوں کا نڈر پن!!!
 ان کے جوانوں کا جوش!!!
 ان کے بوڑھوں کا اِستقلال !!!
اور ان کے مَردوں کے بُلند حوصلے !!
اس بات کے گواہی ہیں کہ یہ لوگ چن لیے گئے ہیں۔  
یہ سمندر کی ریت سے دریافت ہونے والے وہ سیپ کے موتی ہیں ۔ جن کی تڑپ پر فرشتے تڑپییں۔ اور جن کی تکلیف اللہ سبحانہ و تعالی براہِ راست سنیں ۔!!
 یہ لوگ تو خوش نصیب ہیں کہ دنیا کی چند تکلیفیں سہہ کر اپنے لئے ہمیشگی تیار کر گئے ہیں۔!!
لیکن محاسبہ ہمارا ہے۔
کہ امت کی تکلیف محسوس کر کے پتھر بنے بیٹھے رہیں۔۔
یا۔۔!!
اپنے آپ کو ذمہ دار بنائیں!!!
کہ سوال تو کیا جائے گا...!

اللهم انصر الإسلام والمسلمين، خاصة في فلسطين.
اللهم انصرهم بالملائكة، فإن الأمة قد خذلتهم.



*ٹھہر کر مشاہدہ کرنے والوں کے نام چند گہرے الفاظ*

دل کے گہرے اندھیرے میں خیالات کی لمبی سڑک پر کچھ ٹِمٹماتے جگنو روشنی ڈالنے کو بےحال ہیں۔
مگر اِس سڑک کا مسافر اِن ننھی روشنیوں سے اپنی منزل ڈھونڈنے میں آہستہ آہستہ کھو رہا ہے۔!!!
یوں کہ منزل پر بیٹھے خوشیوں کے باسی بھی اس بھٹکے مسافر کے آنے کی امید کا دیا اور جلانے سے قاصر ہیں۔
لیکن تارے اور چاند آیںٔں گے اور اس بےحال مسافر کو راستہ دکھا دیا جائے گا۔!!!
بس تب تک اِسکے ہاتھ میں موجود صبر و برداشت کی لاٹھی اور توکل کی تسبیح نہیں ٹوٹنی چاہیے۔کہ یہ ہی تو اِس کی ان سانسوں کی کل متاع ہیں۔!!!
اور آس پاس منڈلاتے جگنو اِس کے اِن لمحوں کی زندگی۔!!
کرم ہو گا، کرم کر دیا جائے گا!!!
کیونکہ مسافر کی مسافت اِس کرم کے ساتھ بہت لمبی رہی ہے۔
اور یہ بات راہ میں آنے والے پتھر ، اپنی ہیبت سے آگاہ کرنے والے پہاڑ اور گرج کر بے رحمی سے برسنے والے بادل بخوبی جانتے ہیں۔✨

There is so much happening behind the scenes. Don't just sit there and make dua and think that it was just a formality or it "might" be accepted. Nothing was unheard; I repeat, nothing was unheard.
Walk with so much certainty and confidence in Allah's plan that no trial or difficulty can shake your ability to trust Allah's divine Hikmah.
The healing is in the trial. It's there.
It's always there. 
Healing & ease are a byproduct of trials.
Allah doesn't give you a trial and just leave you to be.
He doesn't do that. Ever.
فَاِنَّ مَعَ الْعُسْرِ یُسْرًاۙ
So undoubtedly, along with hardship there is ease. 💓

Alexander Castillo SubhanAllah,     
💓!اللَّهُمَّ بَارِكْ